［美股業績幾分鐘］［星巴克靠加價，可以頂到幾耐？我估好耐］
原文： （https://reut.rs/2V3WrOE） 'Anemic' traffic raises doubts over Starbucks sales gains
圖就星巴克官網 （http://bit.ly/2GGp1vD）
故事好簡單，星巴克個業績其實勝過預期，股價一度創新高，但之後冇乜力。分析員開始擔心，之後點算？（當然亦可能只係因為股價已經唔平所以冇力）
點解會擔心之後點算？就係正如路透社的文講，'Anemic' traffic。當然唔好標題黨，我開頭心諗，少咗人去舖又如何？個個用App落外賣啦。然後再諗下：其實用App都係要去間舖度嘛！況且，未有咁高科技數住人頭下話？
路透社題講嘅traffic，係指交易數目，單數（唔係單雙數的單數，咁當然單數可以係單數，亦可以係雙數）
正如舊文講，零售或者工業股嘅嘢，不外乎就係 量Ｘ價，volume X ASP（http://bit.ly/2GJ5Ykp 希望顧客買多啲，同埋加到價）．咁快餐店咖啡店嘅嘢，都不外乎係 單價Ｘ單數。幾多張單Ｘ一張單幾錢。係咁簡單。
順手講多筆，本人唔係睇零售股（少好多著數的說，睇莎莎就話過年醒PACK化妝品畀你，睇李寧醒對鞋比你，但睇恒生總冇可能醒幾千蚊比你）。但有個概念大家都要知，SSSG，Same-store sales growth，同店銷售。有時又叫Comparable Store Sales Growth，CSSG，口頭就叫Comps Store Sales。
原理好簡單，就係只計啲「可比」嘅門店。例如星巴克嘅可比門店，係計開咗13個月或以上嘅。點解要咁？因為你靠不停開分店，當然實谷到個sales。唔係話唔得唔係話啲錢臭，但一來開新店有極限，二來要成本。三來，都想分開兩樣嘢睇。我會想知你收入增長，幾多係嚟自開新店，幾多係舊店做得好帶嚟。
好啦，星巴克嘅問題，似乎就出現在呢度。你去份業績睇下（http://bit.ly/2GGp1vD），唔使睇晒，搵有Comparable Store Sales Growth嘅表就科勞到。
可以見到，差不多所有地區嘅Comparable Store Sales Growth，差不多都係靠Change in Ticket，單價，去推動。至於Change in Transactions，單數增長，係近乎零嘅。即係話，冇多人幫襯咗，冇多咗單。但只係每張單大家洗多咗錢。
再細睇，真係咁喎。美洲（美國加拿大啦，墨西哥人唔飲的，飲Tequila或者 Corona），平均單價升4%，單數冇增長。中國及亞太區，平均單價升2%，單數冇增長。EMEA （歐洲中東非洲，又學多個術語了，讀M-mia仲型）呢，平均單價升2%，單數又係冇增長。
更加令人擔心嘅係，中國（同美國一樣，要另外列出嚟喎，認真畀面）。平均單價升4%，但單數，仲要跌，驚驚。當然其中一個原因係面對對手，瑞幸咖啡。間嘢而家上市添，又有人同佢癲，又有錢繼續燒。
咁有啲分析員就有啲擔心咯，你加價可以加幾多呢？況且，對手上手有錢燒喎。
小弟認為，其實都係睇你睇兩個月定睇兩年。短期，股價都新高啦，就一定係對壞消息敏感啲，對好消息冇乜反應。但加價？我就覺得幾有信心。本人唔飲星巴克咖啡（但我輕易做到金會員，日日飲茶咪得），但照我理解，其實多數人都唔係好理啲咖啡係點，係型，係一種生活態度嘛，係上瘾嘛。其實同煙仔一樣，應該幾有加價空間的。當然煙仔係幾間大廠合謀，咖啡都仲要問下對手係咪一齊加嘅。
另外，瑞幸云云，唔外國都要講，算吧啦。我冇飲過啲咖啡，但根本唔係重點。聽講話賣得平嘛，但賣一杯蝕一杯。好彩而家個市都好，仲上到市仲有人同佢癲，但燒得幾耐？星巴克大企業，要燒錢我估你死佢都未死。一時可能受壓，但到瑞幸執埋笠，在中國更加無人可以挑戰星巴克啦（不過，阿爺會唔會想扶持本土企業唔想鬼佬獨大呢，呢啲政治嘢就好難量化了，自己估）
另外，都未寫，其實唔係好識寫。但其實星巴克差不多係用mobile payment 最成功嘅公司，係喎，成功過Apple Pay Google Pay。佢在美國本土嘅用戶多過Apple Pay，更加係Google Pay嘅幾倍．但星巴克by definition 只能在佢嘅店用，個數都可以咁勁，係有啲嘢的。唔知公司點運用定乜啦，斷估唔會賣你啲data（唔好成日以為自己好值錢啦），但呢個優勢都幾值錢。
Search